Эне жана баланын ден соолугун коргоо борборунун жалпы жамааты президент Садыр Жапаровго кайрылуу жасады:
Кайрылуу:
Эң алды менен күтүүсүз жерден каза болгон Бактияр Шакировдун ата-энесине терең кайгыруу менен көңүл айтабыз. Арты кайрылуу, топурагы тороко болсун. Мындай кырсык эч бир жерде, эч качан болбошун тилейбиз.
Урматтуу, Садыр Нуркожоевич! Сизге Шакировдун өлүмүнө байланыштуу окуя боюнча учкай маалымдап, калыстыкты өтүнүү менен ушул кайрылууну жолдоп жатабыз.
Деги эле, медициналык мекеменин күндүзгү иши аяктагандан кийин адамдар жөнөкөй эле ийне сайдыра алышпайт. «Тез жардам» кызматы чакырган адамдарга ийне саюу үчүн барбайт. Ушул себептен, ким эле болбосун, ооруп кала турган болсо, өзү жашаган жакын жердеги ооруканага барышат. Биздин борбор Жал кичи районуна жакын болгондуктан, көп жылдар бою кайрылгандарга, чоң адамдарга дагы жардам берип келебиз. Бул ирет Бактияр Шакиров биздин борбордо иштеген, тааныш медайымга өзүнүн доктуру жазып берген ийнени сайдырып алыш үчүн иш бүткөн убакта келген.
Бул кырсыктын айынан министирдин сунушу аркылуу примьер-министрдин буйругу менен директорду иштен алганы биздин жамаатын ишине тоскоолдук жаратып, балдарга, энелерге жардам берүүгө, ден соолуктарын чыңдоо иштерине дагы чоң кесепетин тийгизет деп эсептейбиз. Биз, жалпы жамаат, мындай чечимди туура эмес деп кабыл алып, өзүбүздүн билдирүүбүздү ачык кат аркылуу кайрылууну чечтик.
Жетекчибиз Узакбаев Камчыбек Аскарбекович бул борборду түпкү пайдубалынан тарта куруп, көп эмгек сарптап, ушул деңгээлге жеткиргени жалпы элге маалым. Ал узак жылдардан бери эл үчүн, элдин, айрыкча келечек ээлери болгон жаш балдарыдын, энелердин ден соолугуна кам көрүп келаткан бирден-бир белгилүү дарыгер жана жетекчи экенин баса белгилейбиз!
Бул оорукана Кыргызстандагы эң жакшы ооруканалардын бири экени талаш маселе эмес. Жетекчибиздин аракети менен биз өнүгүп келебиз. Борбордук Азияда биринчи болуп Кыргызстанга Ядерно-маг томографияны дагы биздин жетекчибиз алып келген. Ал кымбат баалуу меджабдык азыркы учурга чейин иштеп келип, миңдеген адамдардын ден соолугун сактап калганга жардам корпустун курулуш берди. Өткөн жылы 700 млн сомго эл аралык донорлордон инвестиция тартып, балдардын 3-корпусу курулду. Дагы бир инвесторлор менен келишимге кол коюлду, ал дагы 500 млн сомду түзөт.
Биздин борбордо гана Кыргызстан боюнча бөйрөк алмаштыруу операциясы жасалып келет. Бүгүнкү күндө 38 адамга бөйрөк алмаштыруу операциясы ийгиликтүү жасалды. Анын ичинде 37си чоң кишилер.
Көптөгөн медициналык жардамдар чоң кишилерге дагы жалгыз эле биздин борбордо көргөзүлүп келгени жалпы элге белгилүү. Мисалы: нефробиопсия, гемодиализдик жардам, кээ бир гастроскопиянын түрлөрү ж.б процедуралар. Бирок бүгүнкү күндө бул жардамдар токтоп, бизден талап кылып жатат. Жамаатта азыр атмосфера өтө начар. Баарыбыздын иштөөгө көңүлүбүз да жок.
Урматтуу, президент Садыр Нуркожоевич! Министр А.Бейшеналиев биринчи кезекте балдарга, энелерге жардам берсин. Иштеп жаткан жамаатка бут тоспошун каалайт элек. Жогоруда биз Камчыбек Аскарбековичтин эмгегинен эки ооз нерсе гана айттык. Баарын санап айтсак, абдан арбын. Чынында биздин жетекчибиз Кыргызстандагы абдан тажрыйбалуу №1 медициналык жетекчи десек жаңылбайбыз. Эл дагы жакшы билет жана жогору баалайт.
Урматтуу, Садыр Нуркожоевич! Медицина кызматкерлеринин айлык-маянасын көтөрүп, кам көрөм деген оюңузга чоң ыраазычылык билдиребиз.
Биздин жамаат жетекчибиз Камчыбек Аскарбековичти кызматтан четтетүүгө каршы жана аны ар дайым колдойт! Бизди нааразы кылган бул маселени сиз калыс карап, туура чечип бересиз деген үмүттөбүз! Биздин өзүбүздүн ишибизди так, тынч аткарууга кам көрүшүңүздү сизден суранабыз!
Сизди урматтоо менен Эне жана баланын ден соолугун коргоо улуттук борборунун 1250 адамдан турган эмгек жамааты».
