Жасалма дипломду алыштын өзү эле оор кылмыш же болбосо коррупция болуп эсептелет. Ушуга байланыштуу мындай кыйшык жолго барган айбандарды Жогорку Кеңештин курамынан гана чыгарбастан, алардын көп жылдан бери алып келген алдамчы айлыктарын дагы толугу менен төлөтүш зарыл. Мындан тышкары, жасалма диплом менен карьера кылып келген шылуундарды мамлекеттик кызматка тап-такыр жолотпош керек.
Дагы бир маселе. Биздин тийиштүү органдарыбыз ошол жасалма дипломдорду кайсы жогорку окуу жайы берген жана жалган документтерге кайсы жетекчи кол койгондугун аныктап, аларды дагы жоопко тартыш талапка ылайык болот.
Президент Садыр Жапаров: Коррупцияга жол жок жана андай жети баштуу желмогузду жоготууга саясый эркибиз жетет деп дайыма айтып келет. Эгер андай болсо, эмне үчүн жасалма диплом алып жүргөн кылмышкерлер менен эмдигиче чечкиндүү күрөш жүрбөйт? Мамлекеттин материалдык байлыгын уурдоо - бул кечирилгис иш. Ал эми адамдын акыл-эсин жана билимдүүлүгүн аныктаган ырасмый документти уурдап алыш - андан дагы жогору турган кылмыш. Мындай мителерди түп тамырынан жоготмоюн өлкө өспөйт жана өнүкпөйт, коомубуз коркунучта калып, элибиздин турмушу эч убакта оңолбойт.
