2001-жылы жазылып 2010-жылы кыргыз жана орус тилдеринде китеп болуп чыгып, Кыргыз Республикасынын Президенттерине, мамлекеттик катчыларына, министрликтерге, жалпыга маалымдоо каражаттарына, окумуштууларга жана башка мекеме-ишканаларга таратылган – “Программалык-укуктук Кыргызстандын Жалпы жарандык идеологиясы” деген эмгегимдин “Педагогикалык аӊ-сезим концепциясынын” үчүнчү функциясы мугалимдерди коргоого арналган. Анын жыйынтыгы боюнча Кыргыз Республикасынын “Мугалимдин макамы” жɵнүндɵгү мыйзамына сунуш-берене:

Сунуш-берене Мугалимдин макамы жөнүндө

1. Мугалим бүткүл коомдун билим жана ыйман коопсуздугун камсыз кылуунун кепилдиги болуп таанылат.

2. Мугалим – анын намысына жана кадыр-баркына окуучулар тарабынан, окуучулардын ата-энелери тарабынан, ошондой эле коомчулук тарабынан шек келтирүүдөн мыйзам тарабынан корголуп кол тийгис инсан болуп саналат.

3. Мугалим мамлекеттин коргоосуна алынган эң биринчи объект болуп таанылат.

4. Мугалим эң жогорку деңгээлде социалдык коргоого алынып мамлекеттин эң алдыңкы жараны болуп таанылат.

5. Мугалим коомчулуктун ыйман аң-сезимин калыптандырат.

6. Мугалим коомдун руханий баалуулуктарын калыптандырат.

7. Мугалим – коомдун коррупцияланбаган чынчыл мүчөсүн потенциалдуу калыптандыруучу, ошого теӊ экономиканын коррупцияланбаган чынчыл ишмерин калыптандыруучу катары экономиканын өнүгүшүнө кыйыр түрдө шарт түзүүчү болуп таанылат.

Урматтуу юристтер ушул берене-долбоорду юридикалык стилге ылайыктап оӊдоп беришээр.

Удан Дүйшөналы, мурда орус мектебинде мугалим жана тарбия иштери боюнча директордун орун басары болуп убактылуу иштегем.